तीन दिने अनलाइन आइटी मेला शुरु

धरान । सुचना प्रविधिको नयाँ आविष्कार एवं उपलब्धीहरुसम्म सर्वसाधारणहरुको पहुँच पुर्याउने उद्देश्यले धरानमा तीन दिने अनलाइन आइटी मेला शुरु भएको छ ।
कम्प्युटर तथा सुचना प्रविधिबारे पढाईसँगै बिक्रीवितरण गर्दै आएको धरानस्थित अनलाइन कम्युटरले आफ्नो १३ औं बार्षिकोत्सवको अवसर पारेर आइतबारदेखि आइटी मेला आयोजना गरेको हो । तीन दिनसम्म चल्ने आइटी मेलाको उद्घाटन नगरपालिकाका निमित्त कार्यकारी अधिकृत खगेन्द्र प्रसाद खतिवडाले गरेका थिए । मेलामा सुचना प्रविधिका पछिल्ला उपलब्धीहरुलाई प्रर्दशन गरिनुका साथै सस्तो एवं सुलभ मुल्यमा विक्रीवितरण पनि गरिने अनलाइनका प्रबन्ध निर्देशक प्रदिप दाहालले जानकारी दिए । उनका अनुसार मेलामा डेल, एसर, एसस, एचपिलगायत चर्चित ब्राण्डका ल्यापटप, ट्याब्लोइट पिसि, विभिन्न ब्राण्डका इन्टरकम, पेनड्राइभ, हार्डडिस्कलगायत प्रर्दशनी र बिक्री राखिएका छन् । यी सबै सामानहरुमा क्यास छुट दिइएको उनको भनाई छ ।

‘मेलाको मुख्य उद्देश्य सुचना प्रविधिको क्षेत्रमा पछिल्लो समयमा के कस्ता कुराहरु आएको छ, भनेर सर्वसाधारणहरुलाई साक्षात्कार गराउनु नै हो’–दाहालले भने । मेलाको अवसरमा इन्टरनेट सेवा प्रदायक कम्पनी वेभ सफरले सेवा लिने उपभोक्ताहरुलाई एन्टेना र इन्टरनेट जडानमा लाग्ने खर्च मिनाहा गरिदिने घोषणा पनि गरेको छ । यो कम्पनीले जडान खर्च वापत तीन हजार शुल्क लिने गरेको थियो । आइटी मेलामा ५० वाटको पावरले चल्नसक्ने ताइवानको फक्स कर्न कम्पनीले उत्पादन गरेको न्यानो पिसी नामको डेस्कटप कम्प्युटरको बिषेश प्रर्दशनी राखिएको छ । वायरलेस सुविधासमेत भएको यो कम्पयुटर दुर्गम क्षेत्रमा ५० वाटको सोलरले पनि चलाउन सकिने प्रबन्ध निर्देशक दाहालले बताए । ‘यसको मनिटरलाई ५ वाट र सानो सिपियुलाई ४५ वाटको वापर चाहिन्छ, विकट पहाडी क्षेत्रमा ५० वाटको सोलरले मजाले चलाउन सकिन्छ’–उनले भने–‘यसको मुल्य ३० हजार मात्रै हो ।’

बार्षिकोत्सवको अवसरमा आयोजित आइटी मेलाको अवसरमा आइतबार इसेट नोड ३२ नामको इन्टरनेट सेक्युटिरी एन्टी भाइरसको पूर्वक्षेत्रमा बिक्री शुरुवात गरेको अनलाइनले जनाएको छ । यो एन्टिभाइरस खरीद गर्दा ग्राहकहरुले ४ जिबीको पेनड्राइभ निःशुल्क उपहार पाउनेछन् । यसैगरी, आइटी मेलाबाट नै माइक्रोसष्ट(एमसिएचसि÷एमसिएच), सिस्को, लिनक्सलगायत विश्वव्यापी कम्पनीबाट मान्यताप्राप्त कोर्षको पनि औपचारिक शुरुवात गरेको अनलाइनले घोषणा गरेको छ । छ महिने कोर्ष अध्ययन गर्न चाहनेलाई बेसिक कोर्ष, आवश्यक पुस्तक, इन्टरनेट वायरलेस राउटर,सिडि, विन्डोज ८ को सक्कली सिडीलगायत छात्रवृत्तिकोरुपमा निःशुल्क उपलब्ध गराइने घोषणा गरेको छ ।