श्री सुब्बाको लघुकथा संग्रहको विमोचन

धरान । कविता लेखनबाट करिब पाँच दशकअघिदेखि नेपाली साहित्यमा कलम चलाउन थालेका श्री सुब्बाको पहिलो कृतिको रुपमा भने लघुकथा प्रकाशन भएको छ । डिपोटियन स्पोर्टस क्लबले प्रकाशन गरिदिएको लघुकथा कृति ‘रुख र मानिसहरु’को बुधबार एक समारोहबीच विमोचन भएको छ ।
उनको कृतिको साहित्यकारहरु प्रा.डा.गोपाल भण्डारी, डा.खेम दाहाल, शरणकुमार राई, अविराम क्रान्ति(गोपाल देवान)सँगै डिपोट उच्चमाविका प्राचार्य राजकुमार राई, व्यवस्थापन समितिका अध्यक्ष पूर्व गोर्खा मेजर श्रवणकुमार लिम्बू, प्रकाशक क्लबका अध्यक्ष प्रविण राईले संयुक्तरुपमा विमोचन गरेका थिए । विमोचनपछि आयोजित अन्र्तक्रियामा डा. खेम दाहालले दुई दशकअघिको नेपाललाई चिनाउने कथाहरु पनि समेटिएको टिप्पणी गरे । संग्रहका लघु कथाले कर्मचारी तन्त्र, घुस खोर, कामचोरलगायतका प्रवृत्तिलाई चोटिलोरुपमा ब्यङ्ग्य गरेको दाहालले बताए । ‘लघुकथा पढ्दै जादा रहस्यमय हुन्छ र अन्त्यमा मात्रै रहस्यको पर्दाफास हुन्छ । यो संग्रहमा पनि यस्तै रोचकशैलीका कथाहरु छन्, जसले अन्त्यमा मात्रै खुल्दुली मेट्छ’–दाहालले भने–‘हाम्रो समाजका घटनाहरुलाई रोचक र समसामयिकरुपमा प्रस्तुत गरिएका छन् ।’

अर्का साहित्यकार शरणकुमार राईले संग्रहका आधा कथाहरु लघु कथनकोरुपमा रहेको टिप्पणी गरे । उनका अनुसार कथामा लेखकले पात्रमार्फत आफ्ना कुराहरु अभिव्यक्त गर्छन् भने कथनमा लेखक आफै म पात्र भएर आफ्नो धारणा, भनाईहरु अभिव्यक्त गर्छन् । कृतिमा लघुकथन पनि भएकोले यो लघुकथनको पहिलो कृति र लघु कथाको दोस्रो कृति भएको उनले दाबी गरे । राईका अनुसार यसअघि लघुकथा संग्रहकोरुपमा जगदीश नेपालीको प्रकाशन भइसकेको छ । ‘आधा लघुकथा र लघुकथन भएपनि रचनाहरुले मानिसको आक्रोश, पीडालाई व्यक्त गर्न सफल भएको छ’–राईले भने ।
पत्रकार एवं साहित्यकार गोपाल देवान(अविराम क्रान्ति)ले लघुकथाको महत्वपुर्ण त्तत्व लघुआयतन र कौतुहलता हुनै पर्ने र सुब्बाको कृतिमा यी दुवै त्तत्व भएकोले संग्रहका कथाहरु उत्कृष्ट बनेको टिप्पणी गरे । ‘लघु आयतनका कथाहरु छन्, र एक पछि अर्को हरफमा कौतुहलता पनि छ’–उनले भने । लेखकका अनुसार कृर्तिमा ५६ वटा लुघकथाहरु समेटिएका छन् । यी कथाहरु उनले चालिसको दशकदेखि लेख्न थालेका थिए । साहित्यमा भने ०२४ सालतिर कविता लेखनबाट औपचारिक प्रवेश गरेको सुब्बाले बताए । ‘अहिलेसम्म कृति प्रकाशन भएको थिएन, कविताहरु विभिन्न पत्रपत्रिकाहरुमा प्रकाशन भएको थियो’–लेखक सुब्बाले भने–‘लघुकथा प्रकाशन भयो, अब अर्को बर्ष कविता संग्रह निकाल्ने तयारीमा छुँ ।’

सुब्बाको कृर्ति प्रकाशन गर्ने क्लब डिपोट उच्चमाविका भूपू विद्यार्थीहरुको हो । गएको तिहारमा देउसी खेलेर बचेको रकमलाई सदुपयोग गर्न सोही विद्यालयका तेस्रो ब्याच(०२५ सालको एसएलसी)का विद्यार्थी एवं साहित्यकार श्री सुब्बाको पुस्तक प्रकाशन गर्ने निर्णय अनुसार लघुकथा संग्रह प्रकाशन गरेको क्लबका अध्यक्ष प्रविण राईले बताए । कार्यक्रमका प्रमुख अतिथि एवं पूर्वगोर्खा मेजर श्रवणकुमार लिम्बूले रेडियो, टिभि र पत्रपत्रिका प्रकाशन नभएको बेला हस्तलिखित पत्रिकामार्फत यहाँका युवाहरुले साहित्य सृर्जना गर्ने गरेको स्मरण गरेका थिए भने गायक किसोर थुलुङले रुख र मानिसहरु, रसिक डाक्टर, प्रश्न चिन्हलगायत कृर्तिको कथाहरु वाचन पनि गरेका थिए ।