डन छुटाउन कांग्रेसको धरानमा चक्काजाम

धरान । मादकपदार्थ सेवन गरेर प्रहरीमाथि हातपात गरेको आरोपमा पक्राउ परेका तरुण दलका सुनसरी कार्यबाहक सभापति सिजन गुरुङको रिहाईको माग गर्दै नेपाली कांग्रेस सुनसरी जिल्ला समितिले शनिबार चक्काजाम गरेको छ ।
प्रहरीले निर्दोष कार्यकर्तालाई फसाएको भन्दै कांग्रेस सुनसरीले दिउँसो एक बजदेखि २ बजेसम्म एक घण्टा चक्काजाम गराएको हो । कांग्रेस नेता,कार्यकर्ताहरुले धरानको भानुचौक क्षेत्रमा चक्का जाम गर्दा केहीबेर स्थिति तनावग्रस्त बनेको थियो । धरानबाट पहाडी क्षेत्र र तराईतर्फ जाने सवारीसाधान ठप्प बन्यो । कांग्रेसले घोषणा गरेअनुसार इटहरी, इनरुवा क्षेत्रमा भने चक्काजामको प्रभाव पर्न सकेन ।
धरानमा भने कांग्रेस कार्यकर्ताहरुको उपस्थिति बाक्लो रह्यो । चक्काजाम गर्नेक्रममा उनीहरु वडा प्रहरी कार्यालयअघि नै पुगेपछि झडप हुने आशांकामा वरीपरीका पसलहरु बन्द भएको थियो । जनपद र सशस्त्र प्रहरी पनि ठुलो संख्यामा परिचालन भयो । स्थिति तनावपुर्ण बन्दै गएको र सर्वसाधारण यात्रु मर्कामा परेपछि प्रहरीले माइकिङ गरेर चक्काजाम फिर्ता नगरे हस्तक्षेप गर्ने चेतावनी दिएपछि भने समयअगावै चक्काजाम अन्त्य गरिएको थियो ।
राजनीतिको आवरणमा पूर्वमा ठेक्कापट्टा र गुण्डागर्दीमा कहलिएका तरुण दलका सुनसरी अध्यक्ष गुरुङलाई गत असार २१ गते धनकुटाको भेडेटारबाट पक्राउ परेका थिए । मादक पदार्थ सेवन गरेका उनले चेकिङको क्रममा प्रहरीमाथि नै हातपात गरेको आरोप छ । उनीसँगै अन्य ४ जना कार्यकर्ता पनि समातिएको छ । उनीहरुलाई तत्काल धनकुटा सदरमुकाम पठाइएर सार्वजनिक अपराध ऐनअन्र्तगत मुद्दा चलाइएको छ । सुनसरीको हाँसपोशा गाविस घर भएका गुरुङले गुण्डागर्दी, ठेक्कापट्टाबाट अकुत सम्पत्ति जोडेको प्रहरीको भनाई छ । उनीविरुद्ध ज्यान मार्ने उद्योगमा पनि प्रहरीमा उजुरी छ । केही महिनाअघि तरहरा बजारमा एक युवालाई दिउसै तरबारले काटेको अभियोग लागेपछि उनी फरार भएका थिए । गत चैत महिनामा उनी धरानमा तास–जुवा खेलिरहेको अवस्थामा पनि समातिएका थिए । उनी पार्टीको संरक्षण र आडमा कानुनी कारबाही हुनबाट भने जोगिर्दै आएका छन् ।

उनको रिहाईको माग गर्दै आन्दोलनको घोषणा गरेको कांग्रेस सुनसरीका जिल्ला सहसचिव विकास आचार्य भने प्रहरीले उनलाई झुटो आरोपमा फसाएको दाबी गर्छन् । ‘सिजन मादकपदार्थ सेवन पनि गर्दैनन्, र घटनामा उनले हातपात गरेको पनि होइन । झुटो आरोप लगाइएको छ’–सहसचिव आचार्यले भने–‘अपराधिक गतिविधि नियन्त्रण हुनुपर्छ भन्ने हाम्रो पनि भनाई हो, तर पुष्टि नभई नै कारबाहीको भागिदार गराउने, निर्दोषलाई फसाउने प्रहरी कार्यको विरोध गछौं ।’