बहराइनमा ‘अनिमेष पाइलाहरु’को विमोचन

धरान, साउन १ । वैदेशिक रोजगारीको सिलसिलामा खाडी मुलुक बहराइन पुगेका नेपालीहरुको संस्था नेपाली साहित्य समाज, बहराइनले पहिलो साहित्यिक कोसेली ‘अनिमेष पाइलाहरु’ प्रकाशन गरेको छ । समाजको पहिलो साहित्यिक कोसेलीको हालै एक कार्याक्रमबीचमा विमोचन गरिएको बहराइनमा रहेका कवि तथा साहित्यकार चन्द्र गुरुङले नागरिकलाई जानकारी दिए ।
 उनका अनुसार उक्त पुस्तकमा बराहराइनमा रहेका ३५ जना सर्जकहरुको रचनालाई समाविष्ट गरिएको छ । शुक्रबार(जुलाई १४) बहराइनको राजधानी मानमास्थित फुड सिटि रेष्टुरेष्टमा आयोजित एक समारोहबीच नेपालका कार्यबाहक राजदुत खगराज पाण्डेले उक्त कृर्तिको विमोचन गरेका थिए । पुस्तक विमोचन कार्यक्रमलाई सम्बोधन गर्दै पाण्डेले महत्वपुर्ण साहित्यिक कार्यक्रम भएकोमा प्रसंसा गर्दै भविष्यमा पनि साहित्यिक गतिविधि तथा लेखन कार्यले निरन्तरता पाउनुपर्ने धारणा राखेका थिए ।

  कार्यक्रममा नेपाली क्लबका उपाध्यक्ष दिपक गुरुङ, समाजसेवी गमबहादुर गुरुङलगायत विभिन्न संघसंस्थाका पदाधिकारीहरुको सहभागीता रहेको कवि चन्द्र गुरुङले जानकारी गराए । पुस्तक अनिमेष पाइलाहरुमाथि युवा कवि सुन्दर गुरुङले समिक्षा गरेका थिए । सोही कार्यक्रममा कवि सुन्दर गुरुङको हालै प्रकाशित कृर्षि ‘आफुले खोजेको स्वर्ग’बारे कवि चन्द्र गुरुङले समिक्षा गरेका थिए । यस्तै, गजलकार तथा चित्रकार भीम रसाइली र कवि सुन्दर गुरुङलाई साहित्यमा पुर्याएको योगदानको कदर गर्दै सम्मान पनि गरिएको थियो । कार्यक्रममा साहित्यकारहरु सुरेश रखाल, पदम बिक, विशाल थापा, डोलिन चिन्तित, भीम रसाइली, रेशम श्रीस, चन्द्र गुरुङ, सुन्दर गुरुङ, रेशम बोहरा, विष्णु दंगाल, असिम महतलगायत श्रेष्टाहरुले रचना वाचन गरेका थिए । कवि रेशम बोहरा र गजलकार विशाल थापाले सञ्चालन गरेको उक्त कार्यक्रममा गजलकार पदम बिक राजले स्वागत गरेका थिए ।