नयाँ लुक्समा हाङकुक साराङ

धरान,साउन १६ । धरान ९, पुतलीलाइनस्थित कोरियन परिकार पाउने रेष्टुरेष्ट हाङकुक साराङ तीन महिना पछि पुनः सञ्चालनमा आएको छ । बन्द भएको तीन महिनापछि रिनोभेसन गरेर शुक्रबारदेखि सञ्चालक महेश श्रेष्ठ बिकीले नयाँ लुक्समा पुनः सञ्चालनमा ल्याएका हुन् ।
यो रेष्टुरेष्ट कोरियाबाट फर्किएका युवा श्रेष्ठले ६ बर्षअघिदेखि सञ्चालन गर्दै आएका थिए । उनका अनुसार आउदो भदौ २० गते रेष्टुरेष्ट ६ बर्ष पुरा गरी ७ बर्ष बर्षमा प्रवेश गर्नेछ । शुक्रबार साँझ एक समारोहबीच श्रेष्ठका जेठा दाजु मुकेश श्रेष्ठ र ७ बर्षीय छोरी अन्नुविन्ति श्रेष्ठले रिबन काटेर गरेका रिओपन(पुनःसञ्चालन)को घोषणा गरेका थिए ।रिओपन भएको हाङकुक साराङमा प्रवेश गर्दा ग्राहकहरुले नयाँपन महसुस गर्ने सञ्चालन श्रेष्ठले बताए । उनका अनुसार रेष्टुरेष्टको ढोका, झ्याल, कुर्सी, टेबल मात्र होइन, सिलिङमा पनि कोरियन कल्चरको थिममा डेकोरेशन गरिएको छ । जसले गर्दा ग्राहकहरुलाई कोरियाकै कुनै रेष्टुरेष्टमा बसेर खाना लिइरहेको महसुस गराउनेछ ।

‘रिओपन गर्दा सामान्य मात्र होइन, डेकोरेशनमा बिशेष ध्यान दिएका छौं । ग्राहकहरुलाई कोरियाकै अनुभूति होस् भनेर लगानी थपेको हुँ,’ सञ्चालक श्रेष्ठले भने । उनका अनुसार २० लाख थप लगानी गरेर रेष्टुरेष्ट रिनोभेसन गरिएको छ । रेष्टुरेष्टको इन्टेरियर डेकोरेशनको थिम भूपू ब्रिटिश लाहुरे गोपाल राईले तयार परेका थिए । उनका अनुसार रेष्टुरेष्टमा सबै टिपिकल कोरियन सँस्कृति झल्किएको छ । ‘म्याग्नोलेमा कलर प्रयोग गरेका छौं, यसले ग्राहकहरुलाई आनन्द महसुस गराउछ । सिलिङमा सेतो र भुइमा ब्रिक कलर छ, भुई पनि कोरियाको पुरानो सँस्कृतिको डिजाइन हो,’ उनले भने ।

रेष्टुरेष्टको डेकोरेशनमात्र परिवर्तन भएको छैन, खानाको नयाँ परिकारहरु र सेफ पनि थप गरिएको छ । मलेसियामा ९ बर्षदेखिब कोरियन रेष्टुरेष्टमा सेफ रहेका सन्तोष लिम्बू यहाँ आएका छन् भने बुदे जंगल, मोक्साल, थेजी खाल्वी,जस्ता थप १५ वटा कोरियन परिकारको स्वाद ग्राहकहरुले पाउनेछन् । यहाँ कोरियाको कुल ४२ खानाको परिवार पाइन्छ । सोही कार्यक्रममा फेस अफ हाङकुक साराङको रुपमा हसिना सुब्बा भएको घोषणा पनि गरिएको थियो । सञ्चालक श्रेष्ठका अनुसार हसिनाले रेष्टुरेष्टको एम्बास्डरकोरुपमा प्रर्वद्धन गर्नेछिन् । उनलाई व्यावसायिकरुपमा ६ महिनाको लागि सम्झौता गरिएको र यो धरानको पहिलो सम्झौता भएको पनि सञ्चालकको दाबी छ ।