इष्र्टन ओपन गल्फको दोस्रो दिन सुर्यप्रसाद शीर्षस्थानमा (फोटोफिचर)

धरान । रोयल नेपाल गल्फ क्लबका सुर्यप्रसाद शर्मा सुर्य नेपाल इष्र्टन ओपनको दोस्रो दिन बिहिबार शीर्षस्थानमा रहन सफल भएका छन् । पार ७० को निर्वाणा कन्ट्री क्लब हेल्थ एण्ड गल्फ रिसोर्टमा बिहिबार ३६ होलको खेल समाप्ति हुँदासम्म कुल ५ अण्डर १३५ कार्ड बनाउदै शर्मा शीर्षस्थान उक्लिएका हुन् ।
पहिलो दिन ४ अण्डर ६६ को कार्ड बनाएर सञ्जय लामासँग एक स्ट्रोकले पछि परेका शर्माले बिहिबार दोस्रो स्थानबाट खेलको शुरुवात गरेका थिए । दोस्रो दिन उनले एक अण्डर ६९ को कार्ड बनाएका थिए । उनले फ्रन्ट नाइनमा पहिलो, तेस्रो र चौथो होलमा बुगी खेपे पनि पाँचौं होलमा बर्डी खेले भने पार ५ को छैटौं होलमा इगल गर्दै थप २ स्ट्रोक जोगाएर लेभर पार ३५ को कार्ड बनाए । यस्तै, ब्याक नाईन एक अण्डर ३४ खेल्ने क्रममा उनले १४ औं होलमा बर्डी गरेका थिए ।

पहिलो दिन ५ अण्डर ६५ को कार्ड बनाउदै शीर्ष स्थानमा रहेका सञ्जय लामा दोस्रो दिनको खेल सकिदा भने सुर्यप्रसादसँग एक स्ट्रोकले पछि पर्दै दोस्रो स्थानमा झरेका छन् । दोस्रो दिन उनले एक ओभर ७१ को कार्ड बनाउने क्रममा फ्रन्ट नाइन लेभर पार ३५ खेले भने ब्याक नाईनमा एक ओभर ३५ को कार्ड बनाए । उनले ब्याक नाईनमा १२ औं र १७ औं होलमा बर्डी गर्दै २ स्ट्रोक जोगाए पनि पार ४ को १० औं होलमा डबल बुगी र १३ औं होलमा थप एक बुगी खेप्दै स्ट्रोक खेर फालेका थिए ।
शीर्ष स्थानमा उक्लिएका नेपालका नम्बर ५ गल्फर सुर्यप्रसादले दोस्रो दिन पटिङ खराब भए पनि ड्राइभ र आइरन सटले साथ दिएको प्रतिक्रिया दिए । ‘छैटौं होलमा ड्राइभ राम्रो भएको भयो, र दोस्रो सटमा इगल भयो’–खुशी हुदै शर्माले भने–‘तर, पटिङले साथ दिएन, भोली(शुक्रबार) राम्रो खेल्नेछु ।’ दोस्रो स्थानमा झरेका सञ्जय लामाले दोस्रो दिन सबै राम्रो भएपनि पटिङ बिग्रेको प्रतिक्रिया दिए ।
प्रतियोगितामा साविक विजेता रवि खड्का, धनबहादुर थापासँगै स्थानीय प्रोफेस्नल खेलाडी सुमन राई कुल एक ओभर १४१ को कार्ड बनाउदै संयुक्तरुपमा तेस्रो स्थानमा छन् । पहिलो दिन ४ ओभर ७४ को खराब कार्ड बनाउदै नवौं स्थानमा रहेका सुमनले दोस्रो दिन भने ३ अण्डर ६७ को कार्ड बनाउदै तेस्रो स्थानमा उक्लिए । यस्तै, पहिलो दिन २ ओभर ७२ को कार्ड बनाएर पाँचौं स्थानमा रहेका रवि खड्का दोस्रो दिन एक अण्डर ६९ को कार्ड बनाउदै तेस्रो स्थानमा उक्लिए । यसैगरि, पहिलो दिन ३ ओभर ७३ को कार्ड बनाएर सातौं स्थानमा रहेका धनबहादुर थापा पनि दोस्रो दिन २ अण्डर ६८ को कार्ड बनाउदै तेस्रो स्थानमा उक्लिन सफल भए ।
नेपालका नम्बर वान गल्फर शिवराम श्रेष्ठ कुल २ ओभर १७२ स्कोरसहित छैटौं स्थान छन् । पहिलो दिन लेभर पार ७० को कार्ड बनाएर तेस्रो स्थानमा रहेका उनले दोस्रो दिन भने २ ओभर ७२ को कार्ड बनाए । स्थानीय प्रोफेस्नल गल्फर सविन सापकोटा कुल ३ ओभर १४३ स्कोर खेल्दै सातौं स्थानमा छन् । पहिलो दिन ४ ओभर ७४ को कार्ड बनाएर नवौं स्थानमा रहेका सापकोटाले दोस्रो दिन भने एक अण्डर ६९ को कार्ड बनाएर दुई स्थान माथि उक्लिए । दोस्रो दिन चौथो स्थानबाट खेल शुरु गरेका स्थानीय थामबहादुर राई कुल ४ ओभर १४४ स्कोरका साथ आठौं स्थानमा झरेका छन् । पहिलो दिन एक ओभर ७१ को कार्ड बनाएका उनले दोस्रो दिन भने ३ ओभर ७३ को कार्ड बनाए । यसैगरि, दोस्रो दिनसम्म कुल ५ ओभर १४५ स्कोर खेल्दै पशुपति शर्मा, रमेश अधिकारी, भुवन नगरकोटी(उमेश) र सञ्जिव नेपाली संयुक्तरुपमा नवौं स्थानमा छन् ।

एमेच्योरतर्फ भने स्थानीय शुक्रबहारदुर राई कुल ५ ओभर १४५ स्कोरका साथ पहिलो स्थानमा छन् । पहिलो दिन ३ ओभर ७३ को कार्ड बनाउदै दोस्रो स्थानमा रहेका उनले दोस्रो दिन भने २ ओभर ७२ को कार्ड बनाउदै शीर्षस्थानमा उक्लन सफल भए । यस्तै, कुल १० ओभर १५० स्कोरका साथ शिवराम माझी र राजु राई संयुक्तरुपमा दोस्रो स्थानमा छन् । दोस्रो दिन ३६ होलको खेल समाप्ति हुदा कुल ३१ प्रोफेस्नल खेलाडीमध्ये ९ जना कटआउट भएका छन् । मुख्य स्पर्धाको तेस्रो तथा अन्तिम दिन शुक्रबार २१ प्रोफेस्नल खेलाडी मात्रै खेल्नेछन् । यस्तै, कुल २४ एमेच्योर खेलाडीमध्ये १८ जना कटआउट भए भने ६ जना मात्रै शुक्रबार तेस्रो तथा अन्तिम दिन खेल्नेछन् ।