घण्टाघरमा चढ्न खुला

धरान । एक महिनादेखि निषेध गरिएको धरानको पर्यटकीय गन्तव्यमध्ये एक भानुचौकस्थित घण्टाघरमा चढ्न एक महिना पछि खुल्ला गरिएको छ । घण्टाघरको सबैभन्दा माथिल्लो तलालाई सुरक्षित बनाएपछि आइतबारदेखि घण्टाघर चढ्न सर्वसाधारण एवं पर्यटकहरुको लागि खुला गरिएको हो ।
घण्टाघर व्यवस्थापन समितिका अनुसार सुरक्षाको लागि घण्टाघरको सबै झ्यालहरुमा ग्रिल लगाइएको छ भने सबै भन्दा माथिल्लो तलामा फेन्सिङ र जाली लगाइएको छ । ‘कोही पनि सजिलै खस्न वा हाम्फाल्न नसकोस् भनेर सुरक्षित बनाएपछि चढ्न खुला गरिएको हो’–समितिका अध्यक्ष एवं पूर्वमेयर मनोजकुमार मेन्याङ्बोले भने–‘झ्यालमा ग्रिल र माथिल्लो तलामा फेन्सिङ र जाली हालेका छौं ।’ उनका अनुसार ५२ फिट अग्लो घण्टाघरको माथिल्लो तलामा पाँच फिट पक्की वालमाथि फेन्सिङ र जाली थपिएको हो ।
गत कार्तिक २ गते मध्याह्न कार्तिक २ गते मध्याह्न मोरङको हरैचा ९ की २१ बर्षी हेमन्ती मगरको माथिल्लो तलाबाट खसेर मृत्यु भएपछि घण्टाघरमा चढ्न निषेध गरिएको थियो । घण्टाघर परिसरको बगैचामा खुला गरिएपनि चढ्न निषेध गरिएपछि घण्टाघरको आम्दानी पनि घटेको थियो । तर, घण्टाघर चढ्न खुला भएपछि भने आम्दानी बढ्ने कर्मचारी राजा सुब्बाले बताए । उनका अनुसार चढ्न खुला गरिएको पहिलो दिन आइतबार नै ९० जनाको हाराहारीमा सर्वसाधारण एवं पर्यटक चढेका छन् । ‘टावर चढ्न निषेध गरेपछि आम्दानी पनि घटेको थियो, अब बढ्छ’–सुब्बाले भने–‘आइतबार आम्दानी बढेर १९ सय भयो ।’
घण्टाघर व्यवस्थापन समितिले आम सर्वसाधारणलाई मनोवैज्ञानिकरुपमा पनि सुरक्षित गर्न हिन्दु सँस्कार अनुसार १४ जना पण्डितहरुद्धारा स्वास्ति शान्ति जप गराएको थियो भने लिम्बू विजुवा ल्याएर स्वघा(जागित्रा मार्ने कर्म) पनि गरेको थियो । ्लिम्बू सँस्कारमा लिम्बू संस्कारमा विजुवाले स्वघा गरेर जागित्रा मारेपछि भड्केको आत्मा पनि मर्ने र दुःख नदिने विश्वास गरिन्छ । जनसहभागीतामा भानुचौकमा बनेको घण्टाघर ०६२ साल पुष २० गते उद्घाटन गरिएको थियो । घण्टाघर धरान घुम्न आउनेहरुको प्रमुख गन्तव्य हो । विवाह भएको तीन दिनमा नै गत कार्तिक २ गते हरैचा ९ की २१ बर्षीय हेमन्ती मगरको घण्टाघरको माथिल्लो तलाबाट खसरे मृत्यु भएको थियो । घटनालगत्तै घटनास्थलबाट नियन्त्रणमा लिएका व्यक्ति, मृतकका श्रीमान्को वयान र पोष्टमार्टम रिपोर्टलगायतको विश्लेषणबाट हेमन्तीले आत्महत्या गरेको प्रहरीले निष्कर्ष निकालेको थियो ।