जानकी पथबाट सफा धरानः हाम्रो अभियानको शुरुवात(फोटोफिचर)

धरान । धरान नगरपालिकालाई वातावरण मैत्री नगरपालिका बनाउन सफा धरान: हाम्रो अभियान कार्यक्रम शुरुवात गरिएको छ । धरान १३ स्थित जानकी पथमा एक कार्यक्रम आयोजना गर्दै नगरपालिकाले वातावरणमैत्री स्थानीय शासन प्रारुप ०७० लाई कार्यान्वन गर्न अभियानको शुरुवात गरेको हो ।
उक्त अभियान शुरुवातको घोषणा संघीय मामिला तथा स्थानीय विकास मन्त्रालयका सचिव सोमलाल सुवेदीले विरुवामा पानी हालेर गरेका थिए । जानकी पथ सामुदायिक टोल सुधार समितिले वातावरण सरसफाई तथा फोहोरमैला व्यवस्थापनमा उत्कृष्ट कार्य गर्दै आएकोले त्यही टोलबाट अभियानको शुरुवात गरेको नगरपालिकाले जनाएको छ ।
अभियानको शुरुवात गर्दै मन्त्रालयका सचिव सुवेदीले भावी पिढीलाई सफा,स्वच्छ वातावरण हस्तान्तरण गर्ने सबैको जिम्मेवारी रहेको बताए । साथै, उनले जानकी पथ टोलबासीले झै सबै टोल, वडाबासी र अन्य नगरपालिकाले पनि स्वच्छ रहन अनुकरण गर्न आग्रह गरे । ‘देशका विभिन्न नगरमा जानकी पथ जस्ता समितिहरु छन्, यस्ता राम्रा टोल विकास समितिहरुलाई पुरस्कृत गर्ने योजना बन्दैछ । यसको लागि फण्ड खोज्दैछौं’–सचिव सुवेदीले भने–‘आफ्नो घर, आँगन मात्रै होइन, टोल, छरछिमेकलाई पनि सफा सुग्घर राख्न, विकास गर्न अग्रसर रहनुपर्छ ।’

सुनसरीका प्रमुख जिल्ला अधिकारी रविराज पन्थले सबैले तोकिएको जिम्मेवारी पुरा गर्ने र कानुनको पालना गरेमा समाजमा शान्ति सुव्यवस्था, सुशासन र विकास हुने धारणा व्यक्त गरे । नगरपालिकाका सामाजिक विकाश शाखाका अधिकृत सुनिल नेपालका अनुसार अभियानलाई धरानका २३ वटै वडामा क्रमशः विस्तार गर्दै लगिनेछ । उनका अनुसार प्रारुपअन्र्तगत सरसफाई र स्वास्थ्य, नवीकरणीय उर्जा, हरियाली शहर र खानेपानी गरि वातावरणमैत्री स्थानीय शासनका आधारमुख ४ सुचक छन् । ‘यी नै सुचकहरुको आधारमा घरलाई स्टिकर दिइन्छ । सबै घरमा स्टिकर भएपछि टोल वातावरण मैत्री हुन्छ र वडाका सबै घरमा स्टिकर भएपछि वडा, सबै वडा भएपछि नगर वातावरणमैत्री हुन्छ’–अधिकृत नेपालले भने । सोही कार्यक्रममा नगरपालिको टोल सुधार समितिलाई फोहोर उठाउने ५ थान ह्विल ब्यारो पनि हस्तान्तरण गरेको छ ।

०७१ जेठ १० गते गठन भएको जानकी पथ सामुदायिक टोल सुधार समिति गठन भएको थियो । एक सय ६५ घर घुरी रहेको समितिले हरेक शनिबार टोल सरसफाई गर्छ भने घरबाट निस्कने फोहोर मैलालाई पनि उचित व्यवस्थापन गर्ने गरेको छ । नगरपालिकाको फोहोर उठाउने गाडी आएपछि टोलमा साइरन बज्छ, र सबैले घरबाट फोहोर निकलेर गाडीमा लगाउछन् । समितिले स्कुलमा डस्टबिन वितरण गरेर फोहोर मैला जथाभावी नफल्न पनि सचेतना गराउदै आएको छ । टोलमा कुकुरलाई बाहिर दिसा गराउन प्रतिबन्ध लगाइएको छ । त्यसरी गरे सम्बन्धित व्यक्तिले नै उठाएर लैजानुपर्ने नियम बनाइएको अध्यक्ष दिलिप श्रेष्ठले बताए ।