अमर सेवा समाजको बहुउद्देश्यीय भवनलाई सहयोग जारी

धरान । सुविधा सम्पन्न बहुउद्देश्यीय भवन (कवर्ड हल तथा पार्टी प्यालेस) निर्माण गर्न लागेको धरान १३ स्थित अमर सेवा समाजलाई आर्थिक सहयोग जुट्ने क्रम जारी छ । यसै साता धरान १३ स्थित सुनगाभा बोर्डिङ स्कूलले २ लाख ५१ रुपैंया सहयोग प्रदान गरेको छ ।
समाजका सचिव गोपाल श्रेष्ठ‘प्रयास’का अनुसार सुनगाभा बोर्डिङ स्कूलले स्कूलका संस्थापक प्रिन्सिपल स्वर्गिय विमल निरौलाको स्मृतिमा नगद प्रदान गरेको हो । स्कूलकी संस्थापिका तथा स्व. निरौलाकी श्रीमति अमिता निरौलाले भवन निर्माण समितिका अध्यक्ष हरीबहादुर लिम्बूलाई हस्तान्तरण गरेकी थिईन् । यसैगरि, धरान १३ का दिपेन्द्र राईले १ लाख ५ हजार, गोविन्द सुब्बाले एक लाख १ सय रुपैंया, ईश्वरमाया राईले ५५ हजार ५ सय ५५,हंसबहादुर लिम्बूले २५ हजार एक रुपैंया, देउकुमार राईले १५ हजार ५ सय ५५ र नेत्र प्रसाद काफ्लेले ११ हजार १ सय ५१ रुपैंया सहयोग गरेका छन् । सोही वडाकी दुवामाया राईबाट १ लाख ५ हजार, मोहन राई तिलकबाट १२ हजार १२ रुपैंया पनि सहयोग प्राप्त भएको सचिव श्रेष्ठले जानकारी दिए । हाल हङकङमा कार्यरत समाजका सदस्य सुनिता लिम्बूले पनि २ लाख २५ हजार रकम सहयोग गरेको समाजले जनाएको छ ।

भवन निर्माणको लागि यसअघिनै विभिन्न ब्यक्तिहरुबाट ३० लाखभन्दा बढी सहयोग प्राप्त भइसकेको समितिका कोषाध्यक्ष देउकुमार राईले बताए । उनले हालसम्म करिब ४० लाख रकम संकलन भएको र विभिन्न स्थानबाट समेत सहयोग आउनेक्रम रहेको जानकारी दिए । धरानलाई खेलकूदको शहरका रुपमा परिचित गराउन समाजले भलिबल, टेवुल टेनिस र बास्केटबल ग्राउण्ड सञ्चालन गरेकोमा सोही संरचनालाई अत्याधुनिक बनाउनका लागि झण्डै १ करोड बढीको भवन बनाउन लागेको अध्यक्ष हरिबहादुर लिम्बूले बताए । भवन निर्माण सहयोग जुटाउन भवन निर्माण समितिका पदाधिकारीहरु सुनसरी क्षेत्र नं. १ का सभासद् लगायत धरानप्रति सहयोग गर्ने विभिन्न दाताहरुलाई अनुरोध गर्न काठमाण्डांै जाने तयारीमा छन् । आगामी मंसिरको पहिलो हप्ता भवनको शिलान्यास गर्ने कार्यक्रम तय भएको छ ।
भवन निर्माण शुरु भएको १८ महिनाभित्र पुरा गर्ने समाजको लक्ष्य छ । समितिले भवन निर्माणमा सहयोग गर्ने दाताहरुलाई आगामी कार्यक्रममा सम्मान तथा अभिनन्दन गर्ने पनि तयारी गरेको छ । भवन निर्माणको लागि ५० हजारसम्म सहयोग गर्ने दाताहरुको नाम ताम्रपत्रमा लेखिने छ भने १ लाखसम्मका दाताको फोटोसहित शिलालेखमा नाम राखिनेछ । यस्तै, २ लाख माथि सहयोग गर्नेहरुको नाममा स्मृति प्रतिमा निर्माण गरिने समितिले जनाएको छ । भवनको कूल लागतको ५० प्रतिशत लगानी गर्ने दाताका नाममा पुरै भवनको नामाकरण हुनेछ । इच्छुक दाताले कृषि विकास बैंक धरान शाखा कार्यालयको खाता नम्बर ०७०२७००७२८७९७०१३ मा सिधै रकम जम्मा गर्न पनि सक्नेछन् । यो भवन निर्माण भएपछी धरानका कुनैपनि  राष्ट्रिय स्तरका खेलका इण्डोर प्रतियोगिताहरु सञ्चालन गर्न सकिन्छ । बहुउद्देश्यिय भवनमा ३ वटा ब्याटमिन्टन कोर्ट, एउटा बस्केटबल कोर्ट र एउटा भलिबल कोर्ट, ४ वटा टेवुलटेनिस कोर्ट र एउटा जिम हल रहनेछ । यस्तै, भवनलाई पार्टी प्यालेसको रुपमा समेत प्रयोग गर्न सकिने छ ।