रविको टिमलाई प्रो–एम उपाधि(फोटोफिचर)

धरान । सुर्य नेपाल इष्टर्न ओपन २०१४ अन्र्तगतको प्रो–एम स्पर्धाको उपाधि व्यावसायिक खेलाडी रवि खड्काको टिमले जितेको छ । निर्वाणा कन्ट्री क्लबस्थित पार ७० को कोर्षमा चौथो दिन भएको प्रो–एम स्पर्धामा कुल १४९ स्कोरका साथ खड्काको टिमले उपाधि जितेको हो ।
स्टेबल फोर्ड फुल ह्याण्डीक्याप आधारमा खेलाइएको स्पर्धामा खड्कासँगै एमेच्योर खेलाडी विना सापकोटा, रुपेन्द्र गुरुङ र रामबहादुर तामाङको टिम पहिलो भएको हो । व्यावसायिक खेलाडी खड्काले ३७ स्कोर गरेका थिए भने विनाले ४२, रुपेन्द्रले ३४ र रामबहादुरले ३१ स्कोर गरेका थिए ।

 स्पर्धामा व्यावसायिक खेलाडी पशुपति शर्माको टिम दोस्रो भयो । शर्माको टिममा एमेच्योर खेलाडीहरु काजी राई, विरेन्द्र राई र तिलक राई थिए । शर्माले ३६ स्कोर गरे भने काजीले ३४, विरेन्द्रले ३४ र तिलक राईले ४१ स्कोर गरे । यसैगरि, स्पर्धामा उमेश नगरकोटीको टिम तेस्रो भएको थियो । नगरकोटीले ३५ स्कोर गरे भने उनको टिमका एमेच्योर खेलाडी पुर्ण लिम्बूले ४०, वलराम राईले ३५ र गजेन्द्र लिम्बूले ३३ स्कोर गरेका थिए ।
स्पर्धामा महिलातर्फ ४२ स्कोर गरेकी विना सापकोटा विजेता बनिन् भने पुरुषतर्फ ४१ स्कोर गरेका तिलक राई विजेता बने । यस्तै, नियरेष्ट टु दि पिनको पुरस्कार पुर्ण लिम्बूले पाए भने लङ्गेष्ट ड्राइभको पुरस्कार रामबहादुर तामाङले हात पारे ।

स्पर्धाका विजेता एमेच्योर खेलाडीहरुलाई ट्रफी पुरस्कार दिइएको थियो । चार दिने प्रतियोगिताको मुख्य स्पर्धामा भने त्रिभुवन आर्मी अफिर्सस क्लबका व्यावसायिक खेलाडी सञ्जय लामाले शुक्रबार उपाधिसहित नगद ९५ हजार जितिसकेका छन् । विजेताहरुलाई प्रमुख अतिथि एवं नगरपालिकाका कार्यकारी अधिकृत टिकादत्त राई, निर्वाणा कन्ट्री क्लबका अध्यक्ष शशीराम भण्डारी, नेपाल गल्फ एशोसिएशनका केन्द्रीय सदस्य मानबहादुर लिम्बू, जिल्ला गल्फ संघका अध्यक्ष डि.बि.राईलगायतले पुरस्कार वितरण गरेका थिए ।