जनतालाई सास्ती, होटललाई भने उद्योगबाटै ग्याँस

धरान । सर्वसाधारण जनताले खाना पकाउने एलपी ग्यासको एउटा सिलिण्डर दुई महिनासम्म पनि नपाएर हैरान छन् । ग्याँस उद्योगहरुले भने सर्वसाधारण जनतालाई सहजरुपमा ग्याँस उपलब्ध नगराई सोझै होटल व्यावसायीहरुलाई ठुलो संख्यामा ग्याँस बिक्री गर्ने गरेको तथ्य फेला परेको छ ।
सोमबार दिउँसो धरानको भानुचौकस्थित धरान किचन रेष्टुरेष्टमा एकै पटक ३२ वटा ग्याँस सिलिण्डर आइपुग्दा सर्वसाधारणमा खैलबैला मच्चियो । होटल सञ्चालक कृष्ण पाठकले ती ग्याँस विराटनगरस्थित कोशी ग्याँस उद्योगबाट खरीद गरि सिधै ल्याएका हुन् । उनले ल्याएका ग्यास सिलिण्डर केही सिल गरिएको थियो भने केही सिल खोलिएको अवस्थामा थियो । सिल खोलिए पनि ती ग्यासका सिलिण्डर भने ग्याँस भरिएको अवस्थामा थियो । यो घटनाले ग्याँसको कृत्रिम अभाव सृर्जना गर्न र कलोबजारीमा उद्योगहरु नै संलग्न रहेको पुष्टि भएको भन्दै सर्वसाधारणहरु आक्रोशित भएका थिए । ‘जनताले एउटा सिलिण्डर नपाएर खाना पकाउन पाएको छैन, होटललाई भने यतिको ग्यास दिइदो रहेछ । यो त सिधै कलोबजारी भयो नि’–होटलमा ग्याँस सिलिण्डर झार्दै गर्दा एक उपभोक्ताले भने–‘सरकार, प्रशासनले किन लाचार बनेको ?’
कोशी ग्याँसका मेनेजर सचित उपाध्यायले भने होटल व्यावसायीलाई ३२ वटा सिलिण्डर दिनु कुनै ठुलो कुरा नभएको भन्दै यसले कुनै समस्या नभएको दाबी गरे । ‘ऐन, नियममा कही पनि कतिवटा ग्यास दिने भनेर लेखिएको छैन, होटल व्यावसायीलाई ३२ वटा सिलिण्डर दिए त के समस्या भयो ?’–उल्टै प्रतिप्रश्न गर्दै उपाध्यायले भने । उपभोक्ताको माग अनुसार ग्यास दिइरहेको दाबी गर्दै उनले मंगलबार धरानमा ३ हजार ग्यास आउने पनि बताए । धरान किचनका सञ्चालक पाठकले भने ग्याँस अभावले होटल नै बन्द गर्नुपर्ने अवस्था आएपछि उद्योगमा नै गएर ग्यास ल्याएको बताए । एक साताअघि अर्डर गरेको खुलाउदै उनले उद्योगबाट सिल नखोली ल्याउदा समस्या होला भनेर सिल खोलेर ल्याएको बताए । कोशी उद्योग प्रालि विराटनगरको ०४२१७ नं.को बिल रसिद अनुसार ३२ वटा ग्यास सिलिण्डरलाई ४६ हजार ४ सय रुपैयामा तिरेको उल्लेख छ ।
एक ग्याँस बिक्रेताका अनुसार उद्योग आपैmले भने उपभोक्तालाई ग्याँस बिक्रीवितरण गर्न नपाउने प्रावधान छ । ‘उद्योग आफैले उपभोक्तालाई ग्याँस बिक्री गर्न पाउदैन, उपभोक्तालाई बिक्री गर्ने अधिकार डिलरहरुलाई मात्रै छ’–ती ग्यास बिक्रेताले भने ।