हङकङमा संकलित रकमले विद्यार्थीलाई शैक्षिक तथा खेल सामग्री दिइने
धरान । ‘सबैको लागि शिक्षा’ को नारा दिएर गएको डिसेम्बर महिनामा हङकङमा आयोजित बि–बोइङ फर एजुकेशन एण्ड म्युजिकल नाइट्स कार्यक्रमबाट संकलित रकम धरानको विष्णुपादुका, पाँचकन्या क्षेत्र र बक्लौरी गाविसका गरिब विद्यार्थीहरुलाई सहयोग गरिने भएको छ । कार्यक्रमको आयोजक एवं धरानको अग्रणी बि बोइङ संस्था द पेश युनियनले मंगलबार पत्रकार सम्मेलन गर्दै विभिन्न प्राथमिक विद्यालय र बाल विकास केन्द्रका विद्यार्थीहरुलाई शैक्षिक र खेलकुद सामग्री सहयोग गर्ने जानकारी दिएको हो ।
कार्यक्रमबाट सम्पुर्ण खर्च कटाएर बचेको एक लाख रकमबाट धरानको विष्णुपादुकास्थित वाल्मिकी प्रावि, पत्राङबारीस्थित पाँचकन्या प्रावि, ठिंगाबारीस्थित जनता प्रावि र पानबारीस्थित रणदेवी प्राविका २ सय ६८ जना विद्यार्थीहरुलाई शैक्षिक सामग्री प्रदान गरिने क्वाङ छाङले जानकारी दिए । यस्तै, ३ वटा प्राविमा सञ्चालित बालविकास केन्द्रका ५७ जना साना विद्यार्थीहरुलाई पनि ५ हजारको दरले खेल तथा शैक्षिक सामग्री दिइने उनले बताए । ‘फागुन ८ र १० गते ती स्कुलहरुमा पुगेर शैक्षिक, खेल सामग्री वितरण गर्नेछौं । यसअघि बक्लौरीको दुई वटा स्कुललाई एक लाखबाट १० हजार बराबरको शैक्षिक सामग्री पनि वितरण गरिसकेको छौं’–क्वाङले भने ।
Comments
Post a Comment