प्रेम कविताहरु ‘आफ्नै छाया पछ्याएर’ को विमोचन

यी दुई नयनका के कुरा गरौं, जसमा सारा संसार छ
जसले जे भने नि हेर, मायाको त्यो नजर नै दमदार छ...।
शनिबार १४, फेब्रुअरी अर्थात प्रणय दिवस । प्रेमी प्रेमीकाहरु सारा संसारलाई भुलेर मायाको सागरमा डुबुल्की मारिहेको बेला धरानका गजलकार श्रेष्ठ परिक्रमा भने साहित्यकारका माझमा तिनै प्रेमीप्रेमिकाको भावनालाई गजलमार्फत प्रस्तुत गरिरहेका थिए । शनिबार प्रणय दिवसको अवसर पारेर धरान १८ स्थित विमल स्मृति पुस्तकालयमा आयोजित प्रसिद्ध प्रेमका कविताहरुको संग्रह आफ्नै छाँया पछ्याएरको विमोचन समारोह प्रेममय बनेको थियो । विमोचन कार्यक्रममा गजलकार श्रेष्ठले मात्रै होइन, अधिकांश कवि, कवियित्रीहरुले प्रेमका कविता, गजलहरु नै सुनाए ।

धरान, इटहरीलगायत क्षेत्रमा विगत चार बर्षदेखि कला, साहित्य र संगीतको क्षेत्रमा कलरव नामक साहित्यक संस्था क्रियाशिल थियो । सोही कलरवका पाँच युवा साहित्यकारहरु मिलेर कलरव प्रकाशन गृह स्थापना गरेका छन् । त्यही गृहले आफ्नो पहिलो प्रकाशनकोरुपमा शनिबार प्रेमका कवितहरुको संग्रह धरानसहित विभिन्न चार स्थानमा एकै समयमा विमोचन गरेको थियो । गृहका सदस्य एवं कवि सुदिप पाख्रिनका अनुसार शनिबार एकै दिन धरान, इटहरी, हेटौडा र काठमाण्डौंको शिल्पी थिएटरमा संग्रहको विमोचन गरिएको हो । धरानमा भाषाविद् डा.टंक न्यौपानेले संग्रहको विमोचन गरेका थिए ।

संग्रहमा ५४ वटा नेपाली कविहरुका प्रेमका कविताहरु समावेश गरिएको छ भने भारतेली नेपाली कविताहरु र अनुदित विश्वप्रसिद्ध कविका कविताहरु पनि समावेश गरिएको छ । संग्रहको सम्पादन युवा कवि हेमन यात्रीले गरेका हुन् । संग्रहमा माधव घिमिरे, वैरागी काइला, तुलसी दिवस, अभि सुवेदी, सरुभक्त, बिक्रम सुब्बा, श्रवण मुकारुङ, मनु मञ्जिल, मोमिलाजस्तो चर्चित नेपाली कविहरुको प्रेम कविता समेटिएको छ भने गुलजार, जेब उन निस्सा, सुतिन्दर सिंह नुर, पाब्लो नेरुदाजस्ता विख्यात साहित्यकारहरुको पनि प्रेम कविता छन् । विमोचन समारोहमा विभिन्न कवि, कवयित्रीहरुले विमोचित संग्रहका कविता र आफ्नै प्रेमका कविता पनि वाचन गरेका थिए ।

राष्ट्रिय प्रकाशन गृहहरुले कविता विधालाई अपहेलना गरिरहेको कारण कलरवले कविता विधालाई प्राथमिकता दिदै प्रकाशन गृह स्थापना गरेको कवि एवं गृहका सदस्य राजेश विद्रोहीले बताए । उनका अनुसार गृहले साहित्यका अन्य विधालाई पनि प्रकाशन अवसर दिए पनि कविता प्राथमिकतामा रहनेछ । कलरवमा आवद्ध युवा कविहरु हेमन यात्री, सुदिप पाख्रिन, सञ्जिव राई, राजेश बिद्रोही र चेवन राई मिलेर गृह सञ्चालनमा ल्याएका हुन् । कविता विश्वमै सर्वोच्च विधा भए पनि नेपालमा प्रकाशन गृहहरुले कविता संग्रह प्रकाशनमा कम चासो दिने गरेकोले मोफसलका कविहरु आफै जुर्मुराउनु परेको सञ्चालकहरुले बताएका छन् । कला, साहित्य र संगीतको क्षेत्रमा नौलो काम गर्ने उद्देश्यले पूर्वको शहर धरान र इटहरीका दर्जन कवि तथा कलाकारहरु मिलेर ०६७ माघमा कलरव गठन गरेका थिए । कलरवले पूर्वमा स्थानीयस्तरदेखि राष्ट्रिय तथा अन्र्तराष्ट्रियरुपमा सभा, सम्मेलनहरु गर्दै आइरहेको छ ।