शनिबारदेखि शुरु हुने बुढासुब्बा गोल्डकपको तयारी पुरा
धरान । शनिबारदेखि शुरु हुने १७ औं बुढासुब्बा रेडबुल गोल्डकपको सम्पुर्ण तयारी पुरा भएको आयोजकले जनाएको छ । आयोजक धरान फुटबल क्लबले शुक्रबार प्रतियोगिताको अन्तिम पत्रकार सम्मेलन गरेर उद्घाटन समारोहको भव्य तयारीमा जुटेको जानकारी दिएको छ । बुढासुब्बा गोल्डकप धरान १७ स्थित एन्फा टेक्निकल खेल मैदानमा फागुन १६ देखि २३ गतेसम्म सञ्चालन हुदैछ ।प्रतियोगितालाई भव्यरुपमा सञ्चालन गर्न प्रचार प्रसारलाई तीब्रता दिइएको छ भने मैदान मर्मत, स्वागतद्धार, तुल ब्यानरलगायतको सम्पुर्ण काम सकिएको आयोजक क्लबले जनाएको छ । मैदानमा दर्शकलाई सहजताको लागि १२ वटा बाँसको प्याराफिट निर्माण गरिएको उपाध्यक्ष एवं मैदान व्यावस्थापन समितिका संयोजक धनप्रसाद राईले बताए । ‘प्रतियोगिताको सम्पुर्ण तयारी पुरा भइसकेको छ, छिटपुट केही बाँकी भए त्यसलाई पनि भोली(शुक्रबार) सक्छौं’–उनले भने । उनका अनुसार एउटा बाँसको प्याराफिटमा सय जना दर्शक अट्ने क्षमता रहेको छ । मैदानको पूर्वपटि २ हजार ५ सय क्षमताको पक्की प्याराफिट छ ।
प्रतियोगितामा शनिबार उद्घाटन खेल आयोजक धरान फुटबल क्लब र रुपन्देहीको लिस्नु क्लबबीच हुनेछ । उद्घाटन सुनसरी क्षेत्र नम्बर १ का संविधासभा सदस्य एवं पूर्वमन्त्री कृष्णकुमार राईबाट हुनेछ । उद्घाटन समारोहमा नेपाली तारा सिजन ३ का उत्कृष्ट तीनमा पर्न सफल इटहरीका कलाकार देवेश राईको सांगीतिक प्रस्तुती पनि रहने आयोजकले जनाएको छ ।
प्रतियोगितामा भारत कलकत्ताको बेलगरिया स्पोर्टिङ क्लबसहित विभिन्न ८ वटा टिमले सहभागीता जनाएको छ । सहभागी टिममा आयोजक, रुपन्देहीको लिस्नु क्लब, त्रिभुवन आर्मी क्लब, पोखरा ११ कास्की, सशस्त्र प्रहरीको एपिएफ, झापाको मुनाल क्लब र मनाङ मस्र्याङ्दी क्लब रहेको छ । पहुना टोली बेलगरिया पहिलो सँस्करणको विजेता हो भने झापाको मुनाल, पोखरा ११ र रुपन्देहीको लस्नु क्लबले बुढासुब्बामा पहिलो पटक सहभागीता जनाएको हो । फागुन २३ मा हुने फाइनलको विजेताले नगद ३ लाख ६० हजार र उपविजेताले नगद १ लाख ८० हजार पाउनेछ । उत्कृष्ट खेलाडीलाई यामाहा मोटरसाइकल दिइनेछ ।
Comments
Post a Comment