गोर्खा भर्ती २ सय बर्ष पुगेको अवसरमा साइकल यात्रा

धरान । बेलायती सेनामा गोर्खा भर्ती शुरु भएको २ सय बर्ष पुगेको अवसरमा बेलायती सेनाका वहालवालाहरु लामो साइकल यात्रा(अभियान)मा निस्किएका छन् । एक्सरसाइज बाइसेन्टेनियल च्यालेञ्ज २०१५ नाम दिइएको उक्त यात्राको नेतृत्व क्याप्टेन राजिव श्रेष्ठले गरेका छन् भने टोलीमा क्याप्टेन इडवर्ड विदी, स्टाफ सार्जन्ट दुगेन्द्र तामाङ, कर्पोरलहरु कुमार थापा, रविन्द्र श्रेष्ठ, निरबिक्रम लिम्बू, एल कर्पोरल रमेश खालिङ, विवेक योञ्जन र पुष्प गुरुङ छन् । यी मध्ये लिम्बू सिंगापुर पुलिस फोर्सका हुन् ।
हाल ब्रिटिश सेनामा कार्यरत एक बेलायती नागरिकसहित ९ जना गोर्खाली युवाहरु मंगलबार सबेरै धरान १८ स्थित ब्रिटिश गोर्खाज धरानमा भेला भए । विभिन्न युद्धमा ज्यान गुमाएकाहरुको शव राखिएको स्थानमा पुगेर पुष्पमाला र श्रद्धाञ्जली अर्पण गरेपछि उनीहरु ९ दिनको लामो साइकल यात्रामा निस्किए । भारतमा शासन गरिरहेको ब्रिटेनको तत्कालीन इष्ट इष्डिया कम्पनी र नेपालबीच सन् १८१४ देखि १८१६ सम्म पटक पटक युद्ध भएको इतिहास छ । अंग्रेज गोर्खा युद्धको नामले चर्चित ती युद्धमा गोर्खाली सेनाले देखाएको शाहस, बहादुरीपनबाट अंग्रेजहरु प्रभावित भएका थिए । युद्ध अन्त्य गर्ने शान्ति सम्झौता हुँदा गोर्खालीहरु इष्ट इष्डिया कम्पनीको फौजमा रहेर काम गर्न सहमत भए । अंग्रेजको फौजमा सन् १८१५ मार्च महिनादेखि गोर्खालीहरु भर्ती हुन थालेको मानिन्छ । यसैको आधारमा ब्रिटिश सेनामा नेपालीहरु भर्ती भएर सेवा गरेको अवधि सन् २०१५ मा दुई सय बर्षमा प्रवेश गरेको छ ।
‘ब्रिगेड गोर्खाले ब्रिटिश सेनामा नोकरी गरेको २ सय बर्ष पुग्दैछ, यसबीचमा हामीले विश्वासनीयता, इमान्दारिता र सम्मानलाई कायम राख्न सकेकोले नै अहिलेसम्म टिकेका छौं’–ब्रिटिश गोर्खा नेपालका गोर्खा मेजर मनोज मोहराले नागरिकसँग भने–‘यो हाम्रो लागि गौरवको कुरा हो, त्यसैले गोर्खा भर्ती २ सय बर्ष पुगेको उपलक्ष्यमा बेलायत र नेपालमा विविध कार्यक्रम हुदैछ, त्यसमध्ये यो पहिलो र फरक किसिमको कार्यक्रम(साइकल यात्रा) हो ।’ उनका अनुसार धरानको पुरानो ब्रिटिश क्याम्पबाट शुरु भएको साइकल यात्रा भैरहवाको पक्लिहवास्थित पुरानो ब्रिटिश क्याम्प हुदै पोखरास्थित ब्रिटिश गोर्खाज पोखरामा पुगेर ११ तारिखमा टुंगिनेछ । यो यात्राको दुरी ७ सय ५० किलोमिटर लामो छ । अहिले धरान र पक्लिहवास्थित ब्रिटिश क्याम्प भने बन्द भइसकेको छ ।

गोर्खा वेल्फेयर ट्रष्टको लागि आर्थिक सहयोग संकलन गर्ने साइकल यात्राको अर्को महत्वपुर्ण उद्देश्य हो । दश लाख रुपैया संकलन गर्ने लक्ष्य लिएको यात्रा शुरु हुनुअघि मंगलबार ७जिआर रेजिमेन्ट एशोसिएशसन सुनसरीले १० हजार ब्रटिश गोर्खा धरानले ३ हजार ८ सय रुपैया पनि सहयोग हस्तान्तरण गर्यो । बेलायती सेनामा हाल ३ हजार हाराहारीमा नेपाली युवाहरु कार्यरत छन् । युद्धमा जानुपर्ने जोखिम भएपनि आर्कषक तलब र सपरिवार बेलायत रहन पाउने सुविधाको कारण हिजोआज युवाहरुमा गोर्खा भर्तीप्रति आर्कषण बढ्दो छ । ब्रिटिश सेनामा भर्ती हुन एसएलसी उर्तीण र साढे १७ बर्षदेखि साढे २१ बर्ष उमेर ननाघेको युवा हुनुपर्छ ।
गोर्खा भर्तीको २ शताब्दीको अवसरमा आगामी मार्च २६ मा काठमाण्डौंमा भव्यरुपमा ब्रिगेड भेला हुदैछ भने २८ तारिखमा धरानमा ७जिआरको भेला हुने कार्यक्रम छ । यस्तै, मार्च २८ देखि ३० सम्म पोखरामा २ जिआरको भेला हुनेछ भने सेप्टेम्बर महिनामा धरानमा क्विन्स गोर्खा सिग्नलको भेला हुने ब्रिटिश गोर्खाज नेपालले जानकारी दिएको छ । यस्तै, बेलायतमा जुन र जुलाई महिनामा भव्य कार्यक्रम एवं गतिविधिहरु हुनेछ भने बेलायतबाटै आएको टिमले सगरमाथा आरोहण पनि गर्ने गोर्खा मेजर मोहराले जानकारी दिए । तत्कालीन इष्ट इण्डिया कम्पनीले भारतमा शासन गरिरहदा गोर्खाली सेनाको १० वटा रेजिमेन्ट थियो । दोस्रो विश्वयुद्ध पछि स्वतन्त्रता आन्दोलनको कारण अंग्रेजले भारत छोडेर जादा १० गोर्खा रेजिमेन्टमध्ये दोस्रो, छैटौं, सातौं र दशौं गोर्खा राइफल बेलायत लिएर गएको इतिहास रहेको पूर्वगोर्खा मेजर दलबहादुर राई बताउछन् ।