नेवार एकताको रक्तदानमा ५५८ पिन्ट रगत संकलन
धरान । धरानलाई रक्तदाताहरुको शहर बनाउने उद्देश्यले शनिबार धरानको भानुचौकमा वृहत रक्तदान कार्यक्रम भएको छ । नेवार एकता समाजको तेस्रो बार्षिकोत्सवको अवसरमा आयोजित रक्तदानमा ५ सय ५८ पिन्ट रगत संकलन भएको थियो ।
पूर्वको सबै जिल्लाबाट विरामी रिफर भएर आउने धरानस्थित बीपी कोइराला स्वास्थ्य विज्ञान प्रतिष्ठानमा रगत अभावले विरामी अकालमा मृत्युवरण गर्न नपरोस् भनेर वृहत रक्तदान कार्यक्रम आयोजना गरिएको समाजले जनाएको छ । कार्यक्रममा एक हजार पिन्ट रगत संकलन गर्ने लक्ष्य राखिएको थियो । ‘स्थापनाकालदेखि नै संस्थाले रक्तदान कार्यक्रम गर्दै आइरहेका छौं, धरानमा उपचार गराउन आउने विरामीहरुलाई रगत अभावले छटपटिनु नपरोस् भनेर यसपाली वृहतरुपमा गरेका हौं’–समाजकी कोषाध्यक्ष एवं कार्यक्रम संयोजक शिला बज्रचार्यले भनिन् ।
करिब तीन बर्षअघि धरानका नेवार जाति संगठित भएर यो संस्था गठन भएको हो । तर, समाजले नेवार जातिको लागि मात्रै नभएर आम समुदायको हितमा सामाजिक काम गर्ने उद्देश्यसमेत बोकेको अध्यक्ष राजेशमान श्रेष्ठले बताए । समाजले धरानलाई रक्तदाताको शहर बनाउने लक्ष्य लिएर हरेक बर्ष कार्यक्रम गर्दै आएको उनले बताए । ‘हरेक धरानबासी रक्तदाता बनुन् भन्ने हाम्रो उद्देश्य छ, धरानको परिचय अब रक्तदाताको पनि शहर होस् भन्ने चाहन्छौं’–अध्यक्ष श्रेष्ठले भने–‘टाढाबाट उपचार गराउन आएका विरामी रगत नपाएर अकालमै मरेको दुःखद् समाचार सुन्न नपरोस् ।’ संस्था कला, संस्कृति र पहिचानलाई जोगाउन गठन भएपनि यसले समाजिक सद्भाव कायम राख्न पनि विभिन्न सचेतनामुलक कामहरु गर्ने बताए ।
Comments
Post a Comment