राष्ट्रपति शिल्ड फागुन दोस्रो साता

धरान । आगामी फागुन दोस्रो साता सुनसरी जिल्लाव्यापी माविस्तरीय सातौं राष्ट्रिपति रनिङ शिल्ड प्रतियोगिता आयोजना हुने भएको छ । सुनसरी जिल्ला खेलकुद विकास समितिले बुधबार पत्रकार सम्मेलन गर्दै फागुन १५ देखि १७ गतेसम्म प्रतियोगिता इटहरीस्थित रंगशालामा हुने जानकारी दिएको हो ।
प्रतियोगिताका फाइनल खेलहरु फागुन दोस्रो साता हुने भएपछि जिल्लाका प्रत्येक निर्वाचन क्षेत्रको आधारमा माघ २६ गतेदेखि नै छनौट प्रतियोगिताहरु शुरु हुने अध्यक्ष नरेन्द्र चोङबाङले जानकारी दिए । उनका अनुसार प्रतियोगितामा पुरुष तथा महिला भलिवल, एथलेटिक्स, उसु, कराते र तेक्वान्दो विधाका खेलाहरु हुनेछन् । एथलेटिक्समा छात्र र छात्रा दुवैतर्फ ट्याक १०० मिटर, २०० मिटर, ४०० मिटर, ८०० मिटर, १५०० मिटर, ५००० मिटर एवं रिले दौड हुनेछ भने फिल्डतर्फ हाईजम्प, लङजम्प, ट्रिपलजम्पलगायत हुनेछन् ।
प्रतियोगितामा हुने खेलहरुमध्ये उसु, तेक्वान्दो र सितेरियो करातेको क्षेत्रगत छनौट नभई सिधै जिल्ला छनौट हुने आयोजकले जनाएको छ । प्रतियोगितामा पहिलो हुने विद्यालयले सिल्डसहित नगद १५ हजार, दोस्रो हुनेले नगद १२ हजार र तेस्रो हुनेले नगद ९ हजार रुपैया पाउने अध्यक्ष चोङवाङले जानकरी दिए ।