धरानमा वास्किन रोविन्स आइसक्रिमको बिक्री शुरु

धरान । अमेरिकाको विश्वप्रसिद्ध आइसक्रिम वास्किन रोविन्सको धरानस्थित शाखाको शनिबार उद्घाटन भएको छ । धरान १० सैनिक चोकस्थित शाखाको चर्चित कलाकारहरु विल्सन बिक्रम राई, डम्बर नेपाली, कलकार संयम पुरीलगायतले उद्घाटन गरेका हुन् । वास्किन रोविन्सको शाखा यसअघि काठमाण्डौं, पोखरा र पूर्वमा विर्तामोडमा मात्रै खुलेको थियो । यहाँ फुर्वा लामा, थमन गुरुङ र पवन खतिवडाको संयुक्त लगानीमा शाखा सञ्चालनमा आएको हो । युवाहरुका अनुसार करिब ६० लाख रुपैया लगानी भएको छ भने ८ लाख रुपैया कम्पनीमा धरौटी राखिएको छ । बिक्री कक्षमा विभिन्न ३१ फ्लेवरका विश्वप्रसिद्ध आइसक्रिम पाइने सञ्चालकहरुले जनाएका छन् भने सुगर फ्रि आइसक्रिम पनि उपलब्ध हुने सञ्चालक थमनले जानकारी दिए ।
 उनका अनुसार युवा पुस्तालाई लक्षित गरेर खोलिएको शाखामा भेनिला, वल्र्ड क्लास चकलेट, स्ट्रवरी, मेल्टेड चक्लेट जस्ता ३१ फ्लेवरका आइसक्रिम पाइन्छ भने केक, माफिन्स पनि उपलब्ध छ । न्युनतम १ सय ५० देखि एक हजार ५ सय रुपैयासम्मको आइसक्रिम पाइने सञ्चालकहरुले जनाएका छन् । वास्किन रोविन्स कम्पनी अमेरिकाको म्यासिच्युटमा सन् १९४५ मा स्थापना भएको थियो । त्यतिबेला १३ वटा स्वादबाट उत्पादन शुरु भएको थियो । यसको शाखा विश्वका विभिन्न ३५ मुलुकमा विस्तार भइसकेको छ । अमेरिकी राष्ट्रपति बाराक ओबामाले सन् १९७७ देखि ७९ को बीचमा यो कम्पनीमा काम गरेका थिए ।