मालपोत र नापी कार्यालय धरानमा ल्याउन बजार बन्द, दबाब समिति गठन

धरान । मालपोत र नापी कार्यलय धरानमा स्थापना गर्ने सरकारको निर्णय कार्यान्वयन गरिनुपर्ने माग गर्दै धरानबासी पनि आन्दोलित भएका छन् । नागरिक सञ्जालको अगुवाईमा बिहान धरानमा वृहत र्याली तथा प्रर्दशन भएको थियो । र्यालीमा नागरिक समाज, उद्योग वाणिज्य संघ, व्यावसायीहरु, राजनीतिक दलका प्रतिनिधि र सर्वसाधारणहरु स्वतस्फुर्त सहभागी भए । उनीहरुले सरकारको निर्णय कार्यान्वयन गर, मालपोत र नापी कार्यालय धरानमा स्थापना गर भन्ने नारा पनि लगाए ।
मालपोत र नापीको सेवा धरानबाट पनि शुरु गर्ने सरकारको निर्णयविरुद्ध इनरुवामा आन्दोलन भएपछि प्रमुख जिल्ला अधिकारीबाट तत्कालको लागि प्रक्रिया स्थगित गर्ने सहमति भएलगत्तै धरानबासी निर्णय कार्यान्वयनको माग गर्दै आन्दोलित भएका हुन् । नागरिक समाज सञ्जाल धरानको आह्वानमा शुक्रबार एक दिन धरान बजार, उद्योग कलकारखाना र शैक्षिक संस्थाहरु पनि बन्द भए ।

भानुचौकमा आयोजित सभामा वक्ताहरुले शुक्रबार सांकेतिकरुपमा बजार मात्रै बन्द गरेको उल्लेख गर्दै निर्णय कार्यान्वयन नगरे अझ कडारुपमा आन्दोलन गर्ने चेतावनीसमेत दिएका छन् । उनीहरुले नेपाल सरकारको निर्णयलाई लागु गराउनुपर्नेमा उल्टै स्थगन गरेको भन्दै प्रजिअको कार्यक्षमता र नीयतमाथि पनि प्रश्न उठाएका छन् ।
सरकारको निर्णयविरुद्ध लेखापढी व्यावसायीको चलखेलमा उद्योग वाणिज्य संघ इनरुवाको नेतृत्वमा इनरुवा बचाउ भन्दै आन्दोलन भएपछि बुधबार प्रजिअले मालपोत र नापीको सेवा विस्तार प्रक्रिया रोकेका थिए । सञ्जालका संयोजक एवं पूर्वमेयर मनोजकुमार मेन्योङ्बोले संघीयता, विकेन्द्रीकरण र शक्ति पृथकीकरणको मुद्दा उठाउने राजनीतिक पार्टीका जिल्ला नेताहरु नै सदरमुकाम केन्द्रीत कार्यालय र सेवालाई जनताको घरआँगनमा पुर्याउन अवरोध गरेर अराजनैतिक चरित्र देखाएको बताए ।
सभामा पत्रकार भवानी वराल, राष्ट्रिय दलित संघका सहअध्यक्ष एवं जनमुक्ति पार्टीका उपाध्यक्ष रमेश गजमेर, एमाओवादीका जिल्ला सहसचिव अइन्द्र बेघा, पत्रकार आनन्द श्रेष्ठ, सुनसरी उद्योग वाणिज्य संघका पूर्वअध्यक्ष मोहनकाजी शाक्य,संघीय समाजवादी पार्टीका जिल्ला अध्यक्ष पारस काङमाङ, कांग्रेस क्षेत्रीय सदस्य मुरारी भटराई, धरान सरोकार समाज काठमाण्डौंका संयोजक प्रभु श्रेष्ठलगायतले पनि बोलेका थिए ।

                                सर्वदलीय दबाब समिति गठन

मालपोत र नापी कार्यालय धरानमा स्थापना गर्ने सरकारको निर्णय कार्यान्वयन गराउन माग गर्दै सभासद कृष्णकुमार राई संयोजक रहेको एक दबाब समिति गठन भएको छ । धरान उपमहानगरपालिकाको आयोजनामा शुक्रबार भएको सर्वदलीय बैठकले सभासद राई संयोजक रहने गरि दबाब समिति गठन गरेको हो । समितिको उपसंयोजकमा सभासदद्धय मिन बिश्वकर्मा र रामकुमार खम्बु रहेका छन् भने सहसंयोजकमा कांग्रेस नगरसभापति किसोर राई रहेका छन् ।

समितिको सदस्यमा सम्पुर्ण राजनीतिक दलका प्रमुखहरु रहने सर्वदलीय वैठकले निर्णय गरेको छ । समितिको बैठकले शुक्रबार प्रेस विज्ञप्ती जारी गर्ने, शनिबार पत्रकार सम्मेलन गर्ने र निर्णय कार्यान्वयनको माग गर्दै प्रजिअलाई ज्ञापन पत्र बुझाउन निर्णय गरेको छ ।