ग्याल्पो लोसार म्याराथुनमा रोहित र मनिषा प्रथम

धरान । शेर्पा समुदायको नयाँ बर्ष ग्याल्पो लोसार ०७१ को अवसरमा आयोजित खुला ग्याल्पो लोसार म्याराथुन दौड प्रतियोगितामा १६ बर्षीय रोहित अधिकारी प्रथम भएका छन् । नेपाल शेर्पा विद्यार्थी मञ्च सुनसरीद्धारा मंगलबार आयोजित प्रतियोगिताको निर्धारित दुरी १८ मिनेट ५१ सेकेण्डमा पार गर्दै अधिकारी प्रथम भएका हुन् । यस्तै, सोही दुरी १९ मिनेट १८ सेकेण्डमा पार गर्दै १९ बर्षीय प्रकाश आङदेम्बे दोस्रो भए भने २० मिनेट ७ सेकेण्डमा दुरी पार गर्दै २० बर्षीय सञ्जय राई तेस्रो भए । प्रतियोगितामा प्रथम, दोस्रो र तेस्रो हुनेले क्रमशः नगद १० हजार, ७ हजार र ५ हजारसहित मेडल र प्रमाणपत्र हात पारे ।

यसैगरि, प्रतियोगितामा महिलातर्फको स्पर्धामा १६ बर्षीय मनिषा राईले निर्धारित दुरी २५ मिनेट ६ सेकेण्डमा पार गर्दै प्रथम भइन् भने २४ बर्षीय सुष्मा राईले २७ मिनेट २९ सेकेण्डमा पार गर्दै दोस्रो र १७ बर्षीय ममता राईले २९ मिनेट १५ सेकेण्डमा दुरी पार गर्दै तेस्रो भइन् । उनीहरुले पनि क्रमशः नगद १० हजार, ७ हजार र ५ हजारसहित मेडल, प्रमाणपत्र हात पारे । यस्तै, जुनियर १० देखि १३ बर्ष उमेर समुहतर्फको स्पर्धामा सोनम शेर्पा प्रथम भए भने शसांक माझी दोस्रो, मोरदाङ शेर्पा तेस्रो र मनिला तामाङ, यमुना राईले सान्त्वना पुरस्कार पाए । जुनियरतर्फका विजेताहरुलाई आयोजकले ट्फी, मेडल र प्रमाण पत्र मात्रै दिएको थियो ।
धरान १८ स्थित श्री हिमालयन महायान गोन्पाको गेटबाट शुरु भएको दौडको दुरी खुला महिला तथा पुरुषतर्फको स्पर्धामा ५ किलोमिटरको थियो भने जुनियरतर्फ २ किलोमिटर मात्रै थियो । प्रतियोगितामा ३ सय २० जना खेलाडीहरुले सहभागीता जनाएको आयोजक संस्थाका अध्यक्ष दोर्ची शेर्पाले जानकारी दिए । पुरस्कार वितरण समारोहमा प्रमुख अतिथि रहेका नेपाल आदिबासी जनजाति महासंघ समन्वय परिषदका अध्यक्ष तथा सभासद नगेन्द्र कुमाल, महासंघका सुनसरी जिल्ला अध्यक्ष खम्बासिंह गुरुङ, शेर्पा विद्यार्थी मञ्चका केन्द्रीय अध्यक्ष इदङ शेर्पा, नेपाल शेर्पा संघका जिल्ला अध्यक्ष गेल्बु शेर्पा, आदिबासी जनजाति महिला महासंघ सुनसरीकी अध्यक्ष कल्पना शेर्पालगायतले सम्बोधन गर्नुका साथै विजेता खेलाडीहरुलाई पुरस्कार वितरण गरेका थिए ।