‘प्रोड्युसर मुर्गा होइनन्, हाम्रो लागि भगवान’

धरान । नेपालमा बर्षमा दर्जनौं फिल्म बन्छन् । ती मध्ये केही फिल्मले मात्रै लगानी उठाउन वा नाफा कमाउन सक्छन् । हलमा कुन फिल्म आयो, गयो भनेर दर्शकले पत्तोसमेत पाउदैनन् । त्यसैले फिल्ममा लगानी गर्ने निर्माता(प्रोड्युसर)लाई ‘मुर्गा’ भनिने गरिन्छ । फष्टाउन नसेकेको नेपाली चलचित्र उद्योगमा लगानी गरेर ‘मुर्गा’ को उपमा पाएका तिनै लगानीकर्ताको परिचय बदल्ने प्रयासमा चलचित्रकर्मीको एउटा टिम जुटेको छ ।
आगमी माघ १७ गते देशभर रिलिज हुने फिल्म ‘प्रोड्युसर’ले निर्माताहरुलाई मुर्गाको रुपमा नभई भगवानकोरुपमा उभ्याउनेछ । यो फिल्मका निर्माता र कलाकारको एक टोली चलचित्र प्रर्वद्धन गर्न हिजोआज पूर्वका शहरमा छन् । ‘नेपाली चलचित्रमा लगानी गर्ने प्रोड्युसर मुर्गा हुन् भन्ने छाप छ, तर के यो सत्य हो त ?’–चलचित्र प्रोड्युसरको प्रर्वद्धनमा धरान आइपुगेका कलाकार विल्सन बिक्रम राईले सोमबार भने–‘वास्तवमा प्रोड्युर चलचित्रकर्मीहरुको लागि त भगवान् हुन्, हामीले यो फिल्ममार्फत यही कुरा स्थापित गर्दैछौं ।’ फिल्ममा लगानी गरेर सयौं चलचित्रकर्मीहरुलाई रोजगारी दिने प्रोड्युसरलाई हेयको भावले मुर्गा भनेकोप्रति उनले असहमति जनाए । उनले भने–‘यति धेरै कलाकार, चलचित्रकर्मीले काम पाएका छन्, अनि प्रोड्युसर हाम्रो लागि भगवान होइन त ?’
प्रोड्युसर नेपाली चलचित्र उद्योगको आफ्नै कथा भएको फिल्म बनेको कलाकार राईले दाबी गरे । उनका अनुसार फिल्म क्षेत्रमा आउने सपना बोकेका युवायुवतीहरुको संघर्षको कथा छ प्रोड्युसरमा । ‘सबैलाई सोह्र सत्र उमेरमा हिरो हिरोइन बन्ने रहर जाग्छ, उनीहरुले कति संघर्ष गर्नुपर्छ भन्ने कथा छ’–विल्सनले भने–‘फिल्ममा सधै हिरो हिरोइनमात्रै देखिन्छ, तर पर्दा पछाडि क कस्को हात हुन्छ ? कसरी काम हुन्छ दर्शकलाई थाहै हुन्न । यो समग्रमा हाम्रो कथा हो, नेपाली चलचित्रको कथा हो ।’ फिल्ममा उनी प्रोडक्सन मेनेजरको भुमिकामा देखिनेछन् ।
फिल्मका प्रस्तुतकर्ता ज्योतिराज राईले नेपाली चलचित्र उद्योगमा वास्तविक जीवनमा जस्ले जुन भुमिका निर्वाह गरेका छन्, पनि त्यही चरित्रमा अभिनय गराएकोले फिल्म यथार्थ बनेको बताए । तथापी, कसैको जीवनमा आधारित वा विदेशी चलचित्रको नक्कल भने नभएको उनले बताए । ‘वास्तविक जीवनमा कलाकारहरु जे छन्, हामीले फिल्ममा पनि त्यही भुमिका दिएका छौं’–प्रस्तुतकर्ता राईले भने–‘फिल्म रमाइलो छ, मनोरञ्जनात्मक छ, दर्शकले मन पराउनुहन्छ भन्ने आशा छ ।’ राजधानीबाहिर पनि नेपाली चलचित्रको ठुलो बजार भएकोले प्रर्वद्धनमा मोफसल आएको उनले बताए ।
आरसि पिक्चर्स र द मिडियाज् कलेक्सनको प्रस्तुती रहेको चलचित्र प्रोड्युसरमा नेपाल चलचित्र निर्माता संघका अध्यक्ष राजकुमार राईको लगानी छ । जनकदिप पराजुलीले निर्देशन गरेको यो चलचित्रमा विल्सनबिक्रमबाहेक बाबु बोगटी, श्याम अर्याल, श्वेता भटराई, श्याम राई, पायल रायमाझी, युवराजलामा लगायत कलाकारहरुको मुख्य अभिनय रहेको छ । रिलिज हुँदासम्म ६५ लाख लगानी हुने भनिएको यो फिल्मको छाँयाकन उपत्यका र ६ दिन दोलखामा भएको थियो ।